БИШКЕК, 13-июнь — Sputnik. Үч адамды өрттөн сактап калган мектеп бүтүрүүчүлөрү Данил Пархоменко, Константин Чернов, Максат Халбеков, Мухаммед Сарсембаев жана Далил Тамашевди премьер-министр Темир Сариев кабыл алып, ыраазылык катын жана өз белегин тапшырды.
5-май күнү Кара-Балта шаарында көп кабаттуу үйлөрдүн бириндеги батир өрттөнгөн. Аны көргөн окуучулар үйдүн ичинде улгайган адамдар калып калганын угушкан соң, өз өмүрүн тобокелге салып үч адамды куткарып калган. Куткарылгандардын бири мүмкүнчүлүгү чектелген адам болгон.
Премьер-министр алардын жасаганын эрдик деп атап, жарандык милдетин эр жүрөктүк менен аткарганы үчүн ыраазычылыгын билдирди.
"Дүйнөдө адам өмүрүнөн кымбат эч нерсе жок. Жардамга муктаж адамдын өмүрүн сактап калууну эрдик деп атай алабыз. Кыргызстанга силер сыяктуу ар түрдүү оор кырдаалда жардамга шашылып, эрдик кылган жигиттер керек", — деди Сариев.
Мектеп бүтүрүүчүлөрү чукул кырдаалда адамды куткаруунун жол-жобосун мектептеги жарандык коргонуу сабактарынын үйрөнүшкөнүн айтышты.
