БИШКЕК, 9-июнь — Sputnik. Россиядагы мигранттар үчүн айдоочулук күбөлүктү алмаштыруу эки жылга жылдырылганын Кыргызстандын Россиядагы элчилигинин маалымат катчысы Айымкан Кулукеева Sputnik сайтына билдирди.
Киргизилген түзөтүүлөргө ылайык, Россияда жүргүнчү ташып же, автотранспорт айдоо менен ишкердик кылгандар айдоочулук күбөлүгүн милдеттүү түрдө алмаштыруусу керек болгон.
Элчиликтен билдиришкендей, Кыргызстан дагы Вена конфенциясынын катышуучусу болгондуктан анын талаптары боюнча айдоочулук күбөлүк бериши керек. Талапка ылайык, күбөлүктүн маңдайка жагындагы тийиштүү жерге аты-жөнү, күбөлүктүн берилген күнү, номери, айдоочунун сүрөтү, колу, жашаган жери, категориясы жана кандай транспортту айдоо үчүн берилгени даана көрсөтүлүшү керек.
"Маалым болгондой, бүгүнкү күнгө чейин Кыргызстандын айдоочулук күбөлүктөрү жогоруда көрсөтүлгөн талаптарга жооп бербей келген. Кыргызстан берген айдоочулук күбөлүктө анын жарактуу мөөнөтү, толук аты-жөнү, кан тобу, резус фактору көрсөтүлбөй келген", — деп элчиликтен билдиришти.
Россияда транспорт айдап иштеген Кыргызстандын, Өзбекстандын, Тажикстандын жарандарынын көптөгөн кайрылууларынан соң, Россиянын өкмөтү чет элдик айдоочулук күбөлүк менен РФтин аймагында транспорт айдап ишкердик кылууга салынган тыюуну 2017-жылдын 1-июнуна чейин киргизбей туруу чечимин 2015-жылдын 23-майында кабыл алды.
"Кыргызстандын жарандары өздөрүнүн улуттук үлгүдөгү күбөлүктөрүн Россияныкына алмаштыруу боюнча аракеттерди көрүшү керек", — деди элчиликтин маалымат катчысы.
Андыктан КРдин РФтеги элчилиги Россиянын аймагында убактылуу же туруктуу иштеп жаткан жарандарды улуттук үлгүдөгү айдоочулук күбөлүктү белгиленген мөөнөт ичинде алмаштырып алууну сунуштайт.
