БИШКЕК, 5-июнь — Sputnik. Операциядан кийин бир аз кыйналып турганын, ымыркайлардын абалы жакшы экенин Sputnik агенттигине үч эмди жарыкка алып келген Бактыгүл Камчыбек кызы билдирди.
5-июнь күнү Бишкек шаарынын алтынчы төрөт үйүндө 23 жаштагы Бактыгүл Камчыбек кызы үч эм – бир уул, эки кыз төрөгөн. Үйбүлөсүндөгү пикир келишпестиктерден улам учурда барар жери жок экенин айткан келин өлкө жетекчилеринин жардамына муктаж экенин маалымдаган.
"Балдарды жаңы эле көрүп келдим. Абалдары жакшы, капельницада экен. Өзүм операциядан кийин бир аз кыйналып турам", — дейт эне.
Келиндин төрөт үйүнөн качан чыгары белгисиз. Ал азырынча туугандарынан да, кайын журтунан да эч ким келип кабар ала электигин кошумчалады.
"Балдардын төрөлгөнү тууралуу угуп-укпаганын билбейм. Эч ким келген жок", — деди Бактыгүл.
Үч эмдин төрөлүшү тууралуу ЖМК жарыялангандан кийин КР премьер-министри Темир Сариев келинге өкмөт бардык керектүү жардам көрсөтөрүн билдирген.
Хабибулла, Ханифа жана Хабиба ысымдары ыйгарылган ымыркайлардын салмагы — 2115, 2200 жана 2480 граммды түзөт.
