БИШКЕК, 4 июн — Sputnik. "Эстеликтин түбөлүк оту" мотожүрүшүнүн катышуучусу марафондун акыркы чекити болгон Бишкекти карай жолдо марага 100 чакырым калганда кырсыктан каза тапкандыгы туурасында Кыргыз географиялык коомунун жетекчиси Саламат Аламанов билдирди.
Мотожүрүштүн багыты: Санкт-Петербург — Таллин — Рига — Вильнюс — Брест — Минск — Волгоград — Грозный — Тбилиси — Ереван — Баку — Ашхабад — Душанбе — Ташкент — Алматы — Бишкек.
Жүрүштүн координатоу Наталья Бочкованын айтымында, өлүмгө алып келген кырсык бейшемби күнү эртең менен эрте Кордай айылында (Казакстан) болду.
"Даниил Торопов унааны башкара албай калып, каза болду. Биз үчүн бул эч бир күтүүсүз окуя. Жолдошубуздун өлүмүнө байланыштуу процедуралардан өтүү үчүн биз Алматыга кайтабыз", — деди уюштуруучу.
Акциянын катышуучулары жүрүштү аягына чыгарууну чечишкенин кошумчалады Бочкова.
Аламанов жергиликтүү коомчулук Тороповдун өлүмүнө катуу кайгырышканын билдирди.
"Биз алардын келишин бир айдан бери күтүп жатканбыз. Биз үчүн бул чоң кайгы, сөз айтуу кыйын болуп турат", — деди коомдун жетекчиси.
37 жаштагы Даниил Торопов Россиянын жараны болчу, Санкт-Петербургда анын жубайы калды.
Тороповдон башка "Эстеликтин түбөлүк оту" марафонуна Михаил Бархатов — жетекчиси, Вячеслав Еремеев жана Наталья Бочкова катышып жаткан.
