БИШКЕК, 1-июн — Sputnik. Кыргызстан жана Катар өкмөттөрүнүн ортосунда инвестицияларды өз ара колдоо жана коргоо боюнча макулдашууга кол коюлганын президенттин маалымат кызматы билдирди.
Өлкө башчы Алмазбек Атамбаев "2014-жылдын 8-декабрында Доха шаарында кол коюлган КР жана Катар өкмөттөрү ортосундагы инвестицияларды өз ара колдоо жана коргоо макулдашуусун ратификациялоо жөнүндө" мыйзамына кол койду.
"Макулдашуунун негизги максаты чет элдик түз инвестицияларды тартуу багытында укуктук базаны түзүү. Укуктук негиздеме инвесторлордун укугун жана кызыкчылыгын коргоону камсыздоого, ыңгайлуу шарттарды түзүүгө жана мүмкүн болгон тобокелчиликтердин алдын алууга багытталат", — деп айтылат билдирүүдө.
Мыйзам 2015-жылдын 30-апрелинде Жогорку Кеңеш тарабынан кабыл алынган.
Документке ылайык, Тышкы иштер министрлигине Кыргызстан тарабынан макулдашууну ишке ашыпуу үчүн зарыл процедуралардын бардыгы аткарылып бүткөнү жөнүндө Катар өкмөтүнө кабарлоо тапшырылды.
Мыйзам расмий жарыялангандан кийин 10 күндүн аралыгында ишке ашат.
