БИШКЕК, 30-май — Sputnik. Алмазбек Атамбаев "ЭлТР" мамлекеттик телерадиоберүү компаниясынын чет жердеги мигранттар турмушун чагылдырган "Мекендештер" телекөрсөтүүсүнүн чыгармачыл жамаатын кабыл алып, 200 миң сом акчалай көмөк көрсөткөнүн президенттин маалымат кызматы билдирди.
Мамлекет башчысы алыстагы мекендештердин турмушунан үзгүлтүксүз кабар алып, алардын күнүмдүк жашоосун чагылдырып турган мындай телекөрсөтүү коомчулук үчүн да, мигранттар үчүн да пайдалуу экенин белгиледи.
Аталган теледолбоор 2008-жылдан тартып эфирге чыгат. Теледолбоордун эмгек жамааты Россиянын жыйырмадан ашуун шаарларын кыдырып, мигранттардын турмушу жөнүндө репортаждарды жасап, көрүүчүлөргө тартуулап келет.
