БИШКЕК, 22-май — Sputnik. Учурда Ош облусунун Кара-Кулжа районунда учурда 100 пайыз электр жарыгы жок экенин Кара-Кулжа райондук Электр тармактары ишканасынын өкүлү Талант Мамасалиев Sputnik сайтынын кабарчысына билдирди.
Анын айтымында, бейшемби күнү кечинде болгон шамалдын кесепетинен Кара-Кулжа районундагы электр мамылары менен бактар кулап, бир катар үйлөрдүн чатырлары жабыркаган.
"Азыр район аймаганда электр жарыгы жок. Болгону, райондук оорукананы гана коштук", — деди ал.
Район аймагындагы Биринчи Май, Тельман, Сары-Булак, Ак-Кыя, Кара-Кочкор айылдары менен райондун борборунда электр жарыгы жок.
Райондук Электр тармактары ишканасы кырсыктын кесепетин жоюп, калкка бир-эки күндүн ичинде толук электр кубатын бере турганын билдирди. Учурда келтирилген чыгымдар эсептелүүдө.
