БИШКЕК, 20-май — Sputnik. Бишкекте 2015-жылдын 3-7-июнь күндөрү биринчи эл аралык олимпиада өтөрүн КР Маданият, маалымат жана туризм министрлигинин басма сөз кызматы маалымдайт.
Борбордук Азияда өтө турган алгачкы бий олимпиадасына Кыргызстандан жана чет өлкөлөрдөн келген бий топтору жана соло аткаруучулар катыша алат. Катталуу 2015-жылдын 23-майына чейин жүрөт.
Сынакта ар кыл жаш курактагы бийчилер өз өнөрүн тартууламакчы. Ал эми калыстар тобунун курамы IDO калыстарынан, КР жана чет өлкөлүк адистерден жана квалификациялык семинардан өткөн калыстардан куралат. Жеңүүчүлөргө акчалай сыйлыктар ыйгарылат.
Бий олимпиадасын өткөрүү Эл аралык бий уюму (International Dance Organization, IDO) менен макулдашылган. Анын жыйынтыгы менен 2017-жылы АКШда IDO версиясы боюнча өтө турган чемпионатка катышуу үчүн мыкты бий топтору жана соло аткаруучулар тандалып алынмакчы.
Уюштуруучулардын билдирүүсүндө, аталган иш-чара жаштардын бий искусствосу жана спорт жаатындагы жетишкендиктерин популяризациялоого, бий искусствосу жана спорт аркылуу улут биримдигин чыңдоого, массалык дене тарбия жана спортту көтөрүүгө багытталган.
