БИШКЕК, 19-май — Sputnik. Улуттук коопсуздук боюнча мамлекеттик комитеттин өкүлү азгырылып жаткандар он беш жаштан өйдөгүлөр экендигин билддирди. Ал эми Башкы прокуратура бул боюнча 76 кылмыш иши козголуп, анын 27 си сотко өткөрүлгөндүгүн маалымдады.
Учурдагы Сириядагы "жихадга" деген түшүнүк менен азгырылып кетип жаткандар, негизинен, жаштар. Бул туурасында УКМКнын өкүлү Канат Тукеев билдирди.
"Диний экстремисттер менен террористтерге динди жаңыдан түшүнүп баштаган, радикал менен салттуу динди айырмалай албаган 16-33 жаш курагындагы жаштар азгырылып жатат. Ошону менен катар прозелитизм маселеси да курч болуп, конфессиялардын ортосунда чыр-чатак күчөшү мүмкүн", — деди УКМКнын өкүлү.
Комитет жыйынына катышкан ИИМ орун басары Курсан Асановдун айтымында, Сирия, Афганистан, Пакистандагы согуш аракеттерине учурда 353 адам катышып жатса, алардын ичинен 49у аялдар. Дагы 31 адам аталган аймактарда жихадчы болуп жүрүп каза тапкан.
