БИШКЕК, 19-май — Sputnik. Кыргызстандын футбол боюнча олимпиадалык курама командасы 2016-жылы боло турган Азия чемпионатынын тандоо турунун алкагында Иорданиянын курамасы менен беттешкенин өлкөнүн футбол федерациясы билдирди.
Кыргызстандыктар 4:0 эсебинде утулду. Оюндун үчүнчү мүнөтүндө Салех Ибрагим кыргызстандыктардын дарбазасына топту башы менен киргизип, эсепти ачты. Кыргызстандык футболчулар да атаандашынын дарбазасына гол киргизүүгө бир нече чабуул жасашты. Биринчи тайм 1:0 эсебинде Иорданиянын пайдасына аяктады.
Экинчи таймда иорданиялыктар дагы үч топ киргизип, эсеп 4:0 болду.
Ал эми Кувейттин командасы Пакистандын курамасын 2:0 эсебинде утуп алды. Эми Кыргызстандын курамасы Пакистандын командасы менен 20-майда саат 23:15те ойнойт. Кувейт менен Иорданиянын командалары упайдык негизде "В" тобунун жеңүүчүсү болуу үчүн күч сынашат.
Тандоо турундагы он топтун жеңүүчүлөрү жана экинчи орунду алган эң мыкты беш команда 2016-жылы январда Катарда боло турган Азия чемпионатынын финалдык айлампасына катышат. Өз кезегинде Азия чемпионаты азиялык курама командалардын Рио-де-Жанейро шаарында (Бразилия) өтчү Олимпиадалык оюндарга катышуусу үчүн квалификациялык мелдештер болуп эсептелет.
