БИШКЕК, 19-май — Sputnik. Эмгек, миграция жана жаштар министрлиги кытайлык жарандарга жасалма патент бергенин Башкы прокуратуранын маалымат кызматы билдирди.
Башкы прокуратура Экономикалык кылмыштуулукка каршы күрөшүү боюнча мамлекеттик кызмат менен биргеликте Эмгек, миграция жана жаштар министрлигинин ишин текшерген.
Министрликтин 2014-жылдагы ишин текшерүүдө алар Кытайдын он жаранына ишкердик жүргүзүү үчүн жасалма патент бергени аныкталган.
Башкы прокуратура тараткан билдирүүгө ылайык, аталган министрликте иштегендер кытайлык жарандарга жасалма документ берүү менен чет элдик жарандардын Кыргызстандын аймагына мыйзамсыз келүүсүнө шарт түзгөн.
Бул факты боюнча Кылмыш жаза кодексинин 304-беренесине (кызматтык абалынан кыянаттык менен пайдалануу), 350-беренесине (жасалма документтерди жасоо) ылайык кылмыш иши козголду.
Учурда тергөө иштери жүрүүдө.
