БИШКЕК, 14-май — Sputnik. Саламаттык сактоо министри Якутияга иштеп жүрүп, айылына убактылуу эс алууга келген дарыгерди Нарын районун 8-март айылында Үй-бүлөлүк дарыгерлер тобунун жетекчилигине дайындап, алып калды. Бул туурасында КСДП фракциясынын кызматкери Жаркын Ибраева Sputnik маалымат сайтына билдирди.
Саламаттык сактоо министрлигине караштуу Улуттук госпиталдын "Ден соолук кербени" долбоорунун кезектеги сапары Нарын аймагында башталып, ага КСДП партиясы демөөрчүлүк кылды.
"Ден соолук кербени" ишин Нарын районунун 3600 калк жашаган 8-март айылынан баштады. Улуттук госпиталдын дарыгерлеринин көчмө борборунда хирург, окулист, ЛОР-врач, невропатолог, УЗИ-адис, кардиолог, ревматолог, терапевт, эндокринолог, стоматолог, гинеколог, педиатр жана ЭКГ-лаборант кирет.
ЖКнын КСДП фракциясынын лидери Чыныбай Турсунбеков эл менен жолугушууда "Ден соолук кербени" эң оболу саламаттыгын жакшылап текшертүү үчүн Бишкекке же облустук борборго барууга чамасы жетпеген кардарларды тейлей турганын белгиледи.
Нарын районунун акиминин орун басары Роза Жумаева Sputnik маалымат сайтына Сыдыкова Якутияга кеткенге чейин аталган райондо дарыгер болуп бир топ жыл эмгектенгенин, эми ал Кыргызстанда калып иштөөгө макулдугун бергенин айтты.
Улуттук госпиталдын он дарыгери 11 күн ичинде Нарын районунун айылдарын кыдырып чыккан соң башка аймактарга сапар алмакчы. Аталган кербендин биринчи баскычында Тоң районуна караштуу айылдардын 5,5 миңге жакын жашоочулары медициналык кароодон өтүп, илдети катуу делген жарандар Бишкектеги ооруканаларга жөнөтүлгөн.
