БИШКЕК, 9-май – Spitnik. Ош облусундагы Алайкуу айыл өкмөтүнө караштуу Көгарт айылында элдин каражатына Улуу Ата мекендик согуштун катышуучуларынын элесине арналган мемориалдык эстелик коюлуп жатат. Бул туурасында Алайкуу айыл өкмөтүнүн жетекчиси Аскарбай Аттокуров билдирди.
1941-жылдагы майданга аталган аймактан 106 киши аттанып, кийин тынч заманда алардын элесин эскерткен эч нерсе курулбаптыр. Айылдыктар былтыр бул ишти демилгелеп, быйыл аны ишке ашырууну колго алгандыгын айыл өкмөтү айтып берди.
"Согушка аттанып, каза болгон, кайтып келген аталарды жаштар билип, эскерип турушу шарт. Былтыр бул ишти ойлоп, быйыл элдин, биздин айылдан Ош жана Бишкек шаарларында иштеп жүргөн айылдаштарыбыздын жардамы менен ишке ашырдык. Жергиликтүү бюджеттен 50 миң сом бөлүндү. Учурда иш кызуу жүрүп жатат", — деди айыл өкмөтүнүн башчысы Аскарбай Аттокуров.
Демилгечилердин бири, Бишкек шаарынын жашоочусу, "Көгарт" коомдук фонду Жоробек Борбодоев согуштун катышуучуларына арнап эстелик ачууга өлкөнүн ичинде гана эмес, чет жактарда иштен жүргөн көгарттыктар каражат жагынан колдоо көрсөткөндүгүн айтты.
"Эң алыста жайгашып, Кытай менен чектешкен аймактагы биздин айылда согуштун катышуучуларына эстелик тургузуу көптөн бери көкүрөктө келе жаткан ой эле. Буга каражат топтоого Бишкек, Ош жана Чүй аймактарында жашап жаткан көгарттыктардан сырткары, Казакстан, Россия, Германиядагы айылдаштарыбыз көмөк көрсөттү. Москвада иштеген бир нече өкүлдөр эстеликтин ачылышына атайын келип катышты",— деп билдирди Борбодоев.
"Көгарт" коомдук фондунун жетекчиси мемориалдык жайдын ачылышы Ардактуу караул, театралдык оюндар менен коштолгондугун билдирди.
