БИШКЕК, 4-май – Spitnik. Президент Алмазбек Атамбаев Бишкек шаарындагы мектеп окуучуларынын театрлаштырылган "Жеңиштин жаш мураскерлеринин парадына" катышып, аларды согуштун баатырларынын элесин унутпоого чакырды.
Президент театрлаштырылган салтанаттын катышуучуларынын алдында чыгып сүйлөп, азыркы жаш муун ардагерлерибиз бизге тартуулаган улуу Жеңишти эскерип жаткандыгы зор мааниге ээ экендигин белгиледи.
Президент ушул заманга жеткирген карыяларыбыз тоодой тирек болуп маңдайыбызда турганы күч-кубат экендигин айтып, ардагерлерибизге миң мертебе таазим этсек да аздык кылаарын айтты.
"Ата Мекендик согуштун убагында алар силерден бир аз эле улуураак улан-кыздар эле. Мисалы, көкүрөгүн дзотко тосуп, эрдиги бүт элибизге даңаза болгон Чолпонбай Түлөбердиев болгону 20 жашта экен. Эл-жери үчүн, кийинки муундардын келечеги үчүн жаш өмүрүн берген баатырлардын элесин эстен чыгарбашыбыз керек", — деди Атамбаев.
Президент балдарга атайын салтанат уюштурганы үчүн ыраазычылык айтып, жакшылыктарды каалады.
