БИШКЕК, 30-апр. — Sputnik. Мамлекеттик каттоо кызматы жыл башынан бери өлкө аймагында 37 миң 609 ымыркай төрөлгөнүн каттаганын аталган мекеменин маалымат кызматы билдирди.
Өлкө боюнча Ош облусунда эң көп төрөлгөн. Бул аймакта 9 миң 659 ымыркай төрөлсө, Жалал-Абадда – 7 миң 610 жана Талас облусунда – 567 ымыркай төрөлгөн.
Андан сырткары 2015-жылдын биринчи кварталында өлкө боюнча 2 миң 703 жубай ажырашкан. Ажырашуу Талас облусунда аз катталган. Бул аймакта үч айда 24 жубай бирге түтүн булатуусун расмий токтоткон.
Жыл жаңыргандан бери республика боюнча 8 147 киши каза болгон. Чүй облусунда 1 699 киши каза болсо, Жалал-Абад облусунда 1 565 жана Талас облусунда 134 киши өлгөн.
