БИШКЕК, 30-апр. — Sputnik. Кыргызстандын Тышкы иштер министрлиги (ТИМ) Непалдагы жер титирөөдөн жаракат алган кырызстандык жаран жөнүндөгү маалыматты текшерип жатат.
ТИМдин маалымат кызматы Sputnik сайтынын кабарчысына билдиргендей, Непал мамлекетинде кыргызстандык жаран жаракат алганын алар ЖМКнын өкүлдөрүнөн билишкен.
"Жарат алган кырызстандык жөнүндө маалымат алуу үчүн Кыргызстандын Индиядагы элчилигине сурам жөнөтүлдү", — деп билдиришти министрликтен.
Шейшемби күнү Тышкы иштер министрлиги Непалда болгон зилзаладан жабыр тарткан кыргызстандыктар жок экенин маалымдаган болчу.
Непал мамлекетинде ишемби күнү, 25-апрелде күчү 7,9 баллга жеткен жер титирөө болгон. Жер титирөөнүн очогу Катманду шаарынан 82 чакырым алыс түндүк-батыш тарапта катталган.
Өлкөнүн полициясы зилзаладан каза болгондордун саны 5,5 миңден ашканын билдирүүдө.
