БИШКЕК, 29-апр. — Sputnik. Бишкек шаардык ички иштер башкармалыгынын жол кайгуул кызматынын жетекчилигине Зумрад Жанабаева бекитилгенин аталган мекеменин маалымат кызматы Sputnik сайтынын кабарчысына билдирди.
Жанабаева 2014-жылдын ноябрь айынан тарта Бишкек шаардык ички иштер башкармалыгынын жол кайгуул кызматынын жетекчисинин милдетин аткарып келген.
Шейшемби күнү өткөн конкурста анын талапкерлигин аталган кызмат ордуна татыктуу деп табышкан. Жакын арада аны дайындоо боюнча ИИМ жетекчисинин буйругу чыгышы керек.
Жанабаева 2014-жылдын ноябрына чейин КР ИИМдин ыкчам аракеттенүү борборунун жетекчиси болуп иштеген. Ал эми буга чейин шаардык жол кайгуул кызматынын жетекчиси болуп иштеп келген Эрлан Атантаев Бишкек шаардык жол кайгуул кызматын атайын батальонунун жетекчисинин орун басары болуп дайындалды.
