БИШКЕК, 24-апр. — Sputnik. Башка планеталардан келген терс күчтөргө каршы чыккан мектеп окуучусу Алтай жөнүндө Кыргызстанда жаралган алгачкы комикс дүйшөмбү күнү сатыкка чыга турганын Sputnik кабарчысына долбоордун жетекчиси Алмаз Султанбай билдирди.
Комикс автору жана долбоордун жетекчиси Султанбай аңгеменин мазмуну менен кыскача бөлүштү. Күндөрүн биринде башка планеталыктардын космос кемеси Бишкекте күндү тосуп алат. Алардын башында Конрукс турат экен. Максаты — өзгөчө бир кристаллдын сыры жашырылган Ала-Тоону басып алуу.
"Кадимки эле мектеп окуучусу Алтайга чоң атасы калтырып кеткен кристталдын кичинекей сыныгы ошол башка планеталыктарды кызыктандыргандан экенин ал өзү да билбейт. Ошол кристаллдын аркасы менен бала бизге катарлаш дүйнөгө туш келет. Ал жакта кыргыз уламыштарынын каармандары жашаган болот", — деп айтып берди Султанбай.
Ошолор менен кошо Алтай башка планеталыктарга каршы чыгат.
Каржынын жоктугу
Эмне үчүн Кыргызстанда чыккан алгачкы комикс жөнүндө шаарда эч жарнама жок деген суроого долбоордун жетекчиси акча жоктугун айтты.
"Биз биринчи жолу чыгарып жатпайбызбы. Ал эми биринчинин баары кыйын болот экен. Анын үстүнө келечекке, мындан бир нерсе чыгарына баары эле ишене бербейт. Баары даяр жана өнүгүп бутуна туруп калгандарды колдогулары келет экен. Ошон үчүн биздин комикс жөнүндө маалыматты колдо бар каражат — Интернет аркылуу жайылтып жатабыз", — деди Султанбай.
Комиксти жаратуунун үстүндө 10 адамдан турган команда иштеп жатат. Баары тең көркөм сүрөт окуу жайынын окуучулары. Султанбайдын айтымында, бир нусканы чыгарууга акысыз, жөн гана чыгармачыл жигери менен иштеп жаткан сүрөтчүлөрдүн жана графикалык дизайнерлердин бир айлык эмгеги кетет экен.
Бишкектин киоскторунда дүйшөмбү күнү пайда боло турган комикстин биринчи чыгарылышы 2 миң нуска болот. Бардыгы болуп комикстин 10 сериясын орус жана кыргыз тилинде чыгарууну пландап жатышат. Бир журналдын баасы 100 сомго жакын болот.
Маектин аягында Алмаз Султанбай комикстин чыгышын жумбайы экөө күтүп жаткан ымыркайга арнай турганын айтты.
Кыргыз комикстери
90-жылдардын акырында өлкөдө Адилет атуу каарман жөнүндө комикс мамлекеттик мүлктү менчиктештирүү боюнча калкка маалымат берүүчү эл аралык уюмдун долбоорунун алкагында чыккан. Эки жыл мурун башка сүрөтчүлөрдүн тобу кыргыз баатыры, зоопаркта бир илбирс денесин тытып алгандан кийин шол жаныбардын күчүнө ээ болгон Барсбек жөнүндө комикстин үстүндө иштеген. Бирок журнал сатыкка чыккан эмес.
