БИШКЕК, 21-апр. — Sputnik. Ата мекендик "Курманжан Датка" тарыхый тасмасы Калифорния (АКШ) штатынын Тибурон шаарында өтүп жаткан эл аралык кинофестивалда башкы эки сыйлыкты жеңип алды. Бул туурасында "Айтыш фильм" студиясынын маалымат катчысы Чолпон Идрисова билдирет.
"Курманжан Датка" аталган кинофорумда "Мыкты тасма" жана "Оператордун мыкты иши" номинацияларына татып, океандын ары жагынан олжолуу кайтты. Тарыхый эпопеяны тартууга Маданиятка эмгек сиңирген ишмер Мурат Алиев операторлук, коомдук ишмер Садык Шер-Нияз режиссерлук кылган.
Аталган кинофестиваль көз карандысыз кинематографисттер тарабынан түзүлүп, дүйнөнү жана маданиятты кинонун көркөмдүгү аркылуу таанууга чакырат.
"Курманжан датка" тасмасы мамлекеттик тапшырык менен 2014-жылы тартылып, ага мамлекеттик бюджеттен 1,5 миллион доллар сарпталган. Анын бет ачары былтыр 31-августта Кыргызстандын эгемендүүлүк күнүндө болгон.
Буга чейин ал бир нече эл аралык кинофестивалдардын атайын сыйлактарына, номинацияларына татып, көп жерден олжолууу кайткан.
