БИШКЕК, 21-апр. — Sputnik. Жумасына 29 долларга (1 миң 700 сомго) жашоо кыйын деди Sputnik кабарчысына актёр Марат Амираев.
Театрдын актёру Голливуд жылдызы Гвинет Пэлтроуну кайталап, жумасына 29 долларга жашоону чечти. Мурдараак Пэлтроу АКШда жардылардын тамак-ашына бөлүп берилчү аталган суммадагы акчага жашап көрүүгө эксперимент жасап, бирок аны ишке ашыра албай койгон.
"Күнүнө эки жолу театрдын ашканасынан тамактанып, тамеки менен жол киреге акча төлөө менен, күнүнө 250 сомго жашоо канчалык оор экенин сездим", — дейт Амираев.
Анын айтымында, коммуналдык кызматтарга төлөп, дагы дары сатып алыш керек болсо, ден соолугуңа зыян келтирүүсүз бул акчага жашоо мүмкүн эмес.
"Кечкисин чай эле ичем. Отуруп алып бир жумага кантип жеткирсем экен деп ойлоном. Менин айлыгым 11 миң сом, эми менден бир канча аз ала тургандарды жакшы түшүнүп калдым", — деп белгиледи актёр.
Пенсионер Надежда Мельниченконун айтымында, ал алты миң сом алат, 1200 сомдой коммуналдык кызматка, эки жарым миңдейи дары-дармекке кетет.
"Калган эки миңден бир аз ашыгын азык-түлүккө жумшайм. Албетте эт сатып алуу жөнүндө сөз да жок. Жумасына мен 575 сом коротом", — деди пенсионер.
Социалдык фонддун маалыматы боюнча, Кыргызстанда пенсиянын орточо көлөмү айына 4600 сом. Муну өлкөнүн 108 миң тургуну алат. 190 жаран сегиз миңге чейинки көлөмдөгү пенсия алат. Социалдык жөлөк пул жумасына 1150 жана эки миң сомду түзөт.
Улуттук статистикалык комитеттин маалыматына ылайык, республикада бир айлык жашоого сарпталуучу каражаттын эң аз расмий көлөмү 4798 сом деп белгиленген. Анын 3359у азык-түлүк сатып алууга каралган.
