БИШКЕК, 20-апр. — Sputnik. Доллардын курсунун өсүшүнөн алган насыяларын төлөй албай жаткан кыргызстандыктар нааразылык акцияларын уюштурат деп билдирди укук коргоочу Динара Назаркулова.
Өткөн аптада, 16-апрель күнү доллардын курсу кескин түшүп кетиши катталып, эки күндө анын баасы 3-4 сомго төмөндөдү.
Бирок бул жагдай доллар менен насыя алгандарды баары бир абалдан куткарбайт. Алар коммерциялык банктар карыздын көлөмүн бир доллар үчүн 47-48 сом курсунда кайра эсептөөнү талап кылып жатат дейт Насыячыларды коргоо боюнча улуттук комитеттин башчысы Динара Назаркулова.
"Элдер өз турак-жайларын сактап калуулары керек. Эгер жарандар карыздарын төлөй албаса, үстүндө үйү жок калышат. Бул тентимиштерге дагы тентимиштерди кошкон болуп калат", — дейт укук коргоочу.
Дүйшөмбүдө тегерек стол өтүп, анда банк өкүлдөрү да катышмакчы. Эгер насыя берүүчүлөр менен аны алгандар тил табыша албаса, карыз болгондор мөөнөтсүз митингге чыгууну убада кылууда.
15-апрелде банктын карыздарлары нааразылык акцияларын уюштурган. Анда 10 чакты адам Ала-Тоо аянтында "Ак үйүдүн" алдында чогулушкан. Расмий уруксаты жок бул митингди милиция токтотту: ага катышкандардын бир нечеси Бишкектин Биринчи май райондук ишчи иштер башкармалыгына жеткирилген.
