Казакстандан каза болгондордун сөөгүн алып келүү үчүн ӨКМ автоунаа жөнөттү

БИШКЕК, 20-апр. — Sputnik. Кыргызстандын Өзгөчө кырдаалдар министрлиги Казакстанда жол кыймылынан кайтыш болгон мекендештердин сөөгүн алып келүү үчүн автоунаа жөнөттү. Бул туурасында ӨКМдин кризистик абалды башкаруу бөлүмүнүн жетекчиси Мухаммед Сваров билдирди.

Жекшемби күнү, 19-апрелде эртең менен ири жол кырсыгынан кыргызстандык 15 адам курман болуп, бир тобу күйүп кеткен. Кырсык Жамбыл облусуна караштуу Моюнкум аймагындагы Алматы — Екатеринбург жолунун 487-чакырымында болгон. Жүк ташуучу "Газель-2705" машинасы менен "Мерседес-Бенц Спринтер" кичиавтобус кагышкан. Кырсык болгон учурда спринтердин ичинде эки айдоочуну жана үч баланы эсептегенде 19 адам келе жаткан.

Кыргызстандагы "Замандаш" ассоциациясы "Мерседес-Бенц Спринтер" кичиавтобусу Ош шаарынан Екатеринбургга сапар алып баратканын билдирди.

Кырсыктын айынан эки машина тең өрттөнүп кеткен. Түшкү саат бирлерде өрт өчүрүлүп, ал жерден 15 сөөк табылган. Алар "Газелдин" айдоочусу жана кичи автобустун 13 жүргүнчүсү деген маалыматтар айтылууда. Дагы бир жүргүнчү Караганды облусунун Приозерск шаарындагы ооруканада көз жумду.   Кырсык болгон жерден "Тез жардам" менен аталган шаардын ооруканасына алты адам жеткирилген.

Сваровдун айтымында, ӨКМдин төрт кызматкери жана КамАЗ автоунаасы  трагедия болгон жерге жөнөп кетти, алар бир нече сааттан кийин жетип калышат.