БИШКЕК, 20-апр. — Sputnik. Өлкө башчы Алмазбек Атамбаев Россия Федерациясына караштуу Саха Республикасынын (Якутия) мамлекеттик жыйынынын (Ил Тумэн) төрагасы, "Дүйнө элдеринин эпостору" эл аралык ассоциациясынын вице-президенти Александр Жирковду кабыл алып, ага "Даңк" медалын тапшырганын президенттин маалымат кызматы билдирди.
Жолугушууда Атамбаев Александр Жирковго "Манас" эпосун, ошондой эле жазуучу Чыңгыз Айтматовдун жана башка кыргыз авторлорунун чыгармаларын кеңири жайылтуу ишине, мамлекеттик ишмер Максим Аммосовдун ысмын түбөлүккө калтырууга кошкон салымы үчүн ыраазычылык билдирди.
Президент Алмазбек Атамбаев жана Александр Жирков Кыргызстан менен Саха Республикасынын ортосундагы маданий-гуманитардык кызматташтык маселелерин талкуулап, эки тараптуу байланыштарды жандандырууда жана тереңдетүүдө биргелешкен ишти улантуунун маанисин баса белгилешти.
