БИШКЕК, 20-апр. — Sputnik. ӨКМдин маалыматы боюнча Ектеринбург шаарына Кыргызстандан кетип бара жатып жол кырсыгынан каза болгондордун саны арбышы мүмкүн. Бул туурасында ӨКМдин маалымат кызматынын жетекчиси Абдишарип Бекилов.
"Каза болгондордун саны 20 деп божомолдоп жатабыз, балким андан да көп болуп калышы мүмкүн. Азыр алар 3 өлүктү аныктай албай жатышат", — деди Бекилов.
Жекшемби күнү Казакстанда жол кырсыгынан каза болгондордун аты-жөнү азыр такталып жатат. Министрликтин маалыматы боюнча, алардын ичинде Ош, Баткен, Нарын облусунун жарандары бар.
Кырсыктуу кичиавтобус Ош шаарынан жөнөгөн деген маалыматтар бар. Ал Бишкектен жолоочуларды кошумча алышы мүмкүн деген версиялар айтылууда.
"Алдын ала маалыматтар боюнча Ош шаарынан чыккан машина деп жатат. Жүргүнчүлөр ар кайсы аймактардан, аларды жолдон деле алып кете беришет, ошон үчүн Нарындын тургундары экен деп айтылып жатат. Бул алдын ала маалыматтар, калгандары такталууда", — деди министрликтин маалымат кызматынын жетекчиси Абдишарип Бекилов.
Ал маалыматтарды Казакстан берип жатканын, азырынча ӨКМде булардын документтери келе электигин кошумчалады. Андыктан аталган министрликтин кризистик кырдаалдарды башкаруу борбору 0 770 88 0019 телефон номерине чалып, кеткендер туурасында маалымат болсо туугандарынын кайрылышын айтты.
