БИШКЕК, 17-апр — Sputnik. Депутат Равшан Жээнбеков Sputnik сайтынын суроолоруна жооп берип жатып, ЖК төрагасынан ал маалыматка түшүндүрмө сурагандыгын, бирок, ал башкача кабыл алды деген пикирин билдирди.
Бейшемби күнү оппозициячыл депутат Равшан Жээнбеков ЖК төрагасы Асылбек Жээнбековдон Ош окуясы учурунда ал курал тараткан деген маалыматка түшүндүрмө берүүсүн сураган. Буга жооп иретинде аталган маалыматты тараткан Ош облустук жана шаардык ИИБдин мурдагы жетекчиси Абдылда Капаровду сотко берерин, ал эми депутатты чагымчылдыкка күнөөлөп, күбө катары сурала тургандыгын айтты.
Анын айтымында, курал боюнча маалыматты 2010-жылы Ош облусунун ички иштер башкармалыгынын расмий жетекчиси болгон адам айтып жатат.
"Мен болгону Жогорку Кеңештин төрагасынан "Мамлекеттеги экинчи адамсыз, курал тараткан деп сизди күнөөлөп жатат, түшүндүрмө берип койбойсузбу" деп талап кылсам, төрага аны башка жагынан кабыл алып жатат", — деди депутат Равшан Жээнбеков.
Бул боюнча Равшан Жээнбеков социалдык маселени көтөргөндүк чагымчылдык деп кабыл алынганын туура эмес деп эсептейт. Парламенттин спикери Асылбек Жээнбеков депутаттын бул аракеттери шайлоо алдындагы кезектеги электорат үчүн жасалган аракет, улут арасындагы мамиледеги чагымчылык деп баалады.
"Мамлекеттин башындагы расмий адамдар улуттар арасындагы, кандайдыр бир курч, социалдык маселелерди чечкенге чара көрбөсө, аны чагымчылдык деп эсептесе болот. Эгерде оппозициялык маанайдагы депутаттар, саясатчылар кайсы бир маселени көтөрүп, ошону чечүүнү талап кылганы чагымчылдык болсо, дүйнө жүзүндөгү оппозицияны кырып ташташы керек", — дейт оппозициячыл депутат.
Депутат менчиктештирилген объекттер тууралуу күнөөлөөнү моюндабай тургандыгын айтты.
