БИШКЕК, 14-апр. — Sputnik. КР президенти Атамбаев РФтин президенти Путинге, ошондой эле Хакасиянын башчысы Зиминге Хакасияда өрттүн кесепетинен каза болгондорго жана олуттуу кыйроолорго байланыштуу көңүл айтты. Бул тууралуу президенттин маалымат кызматы билдирет.
12-апрелде Хакасияда секундуна 30 метрге чейин жеткен шамалдан улам, чыккан өрт ылдамдык менен жайылып кеткен. Өрт 20дан ашык калктуу конуштарды кучагына алып, 5 миңден ашык киши үйсүз калган. Акыркы маалыматтар боюнча, 23 киши каза болуп, 850дөн ашык киши жабыркаган. Россиянын Тергөө комитети Хакасиядагы өрттөн улам беш кылмыш ишин козгоду.
Президенттин телеграммасында каза болгондордун үй-бүлөлөрүнө терең кайгыруу менен көңүл айтары, кырсыктын кесепетинен жабыр тарткандардын тезирээк сакайып кетишин каалары жазылган.
