БИШКЕК, 11-апр. — Sputnik. Президент Алмазбек Атамбаев Кыргызстан менен Кытайдын ортосундагы техникалык-экономикалык кызматташууга өбөлгө түзгөн Макулдашууну ратификациялоого кол койду. Бул туурасында президенттин маалымат кызматы кабарлады.
"КР өкмөтү менен Кытай өкмөтүнүн ортосунда эки тараптуу техникалык-экономикалык жардамдын долбоорлорун ишке ашыруудагы кызматташуунун алкактары жөнүндө макулдашууну ратификациялоо тууралуу" мыйзамды Жогорку Кенеш 2015-жылдын 1-апрелинде кабыл алган.
КР Тышкы иштер министрлиги Кытай өкмөтүнө Кыргызстан тарабынан аталган Макулдашуунун күчүнө кириши үчүн зарыл болгон мамлекеттик ички жол-жоболор аткарылганы жөнүндө белгиленген тартипте билдирүүгө милдеттендирилди.
Макулдашуунун максаты — Кытайдын техникалык-экономикалык жардамынын эсебинен гранттык жана кредиттик долбоорлорду ишке ашырууда Кыргыз жана Кытай Өкмөттөрүнүн ортосунда кызматташуу үчүн базалык жана мыйзамдык негиздерди түзүү болуп саналат. Кытайдын техникалык-экономикалык жардамы акысыз негизде жана жеңилдетилген кредиттер түрүндө берилет.
"Макулдашууну ратификациялоо финансылык-экономикалык кесепеттерди жаратпайт", — деп айтылат өкмөттүн парламентке жөнөткөн өкмөттүн кортундусунда.
Мыйзам расмий жарыяланган күндөн тартып он күн өткөндөн кийин күчүнө кирет.
