"Армияга аттанганда Токмокто уюштурулган атчандар дивизиясына түштүм, бирок, 17 күндөн кийин Чкалов шаарындагы кавалердик офицерлерди даярдоочу училищеге жөнөтүштү. Аны алты айда бүтүп чыгып, согушка кирдим. Чалгынчы элем. Биздикилер 19-ноябрда Сталинградда Фридрих Паулюстун армиясын курчап, ири чабуул башталды. Көп жолдошторубузду жоготтук. Шаарды көздөй акырындап жыла баштаган учурда жарадар болдум", — деп айтып берди Тенти Тамашаев.
Жарадар болуп айылына келип, мектепке директор болуп иштеп жүргөн учурда Тенти ата 1944-жылы кайрадан майданга жиберилген. Ал Жеңишти Европадан тосуп, 1945-жылы июль айында туулуп-өскөн Түп районуна аман-эсен кайтып келген.
