БИШКЕК, 8-апр. – Sputnik. Азыркы кылымдын орто ченинде АКШдан башка бардык өлкөлөрдө динге ишенүүчүлөрдүн саны атеисттерге, агностиктерге жана башка диний эмес көз караштарды туткандарга салыштырмалуу 11 пайызга өсөт деп билдирет РИА Новости, Пью изилдөө борборунун жаңы жарыяланган алдын ала божомолдоолорунда таянуу менен.
Социологдордун эсебине ылайык, бардык диндердин түрүнө ишенүүчүлөрдүн саны туруктуу өсүп отурат. Буддизмди туткандардын гана саны салыштырмалуу өзгөрүүсүз калат.
Сандык жагынан эң чоң жылыш ислам дининде болот – мусулмандар 73%га көбөйүп, ал эми христиандар менен индуисттер 35%га гана өсөт. Ушунун натыйжасында цивилизациянын тарыхында биринчи жолу мусулмандар менен христиандардын саны дээрлик теңдешип, биринчиси 2,8 миллиардга, экинчиси 2,9 миллиардга жетет. Андан тышкары, Европада мусулмандардын саны 2015-жылы 10%ды түзөт.
Христианчылык тездик менен өскөнүнө карабастан, динден баш тартуучулардын эсебинен артка кетет –Пью борборунун алдын ала божомолунда 106 миллионго жакын христиан адам Иисуска ишениминен баш тартып, көпчүлүгү агностик, атеист же башка диний эмес агымдарга өтүп кетет.
Социологдордун алдын ала божомолдоосуна караганда, динге ишенбеген адамдардын саны кылымдын ортосуна карата дээрлик өзгөрбөйт. Алардын саны болгону 1,1 миллиарддан 1,2 миллиардга өсүп, натыйжада жер калкынын жалпы санынын 16%ынан 13%ына түшөт. Мунун себеби — атеисттер менен агностиктердин басымдуу бөлүгү Европа өлкөлөрү менен Кытайда жашайт. Ал эми аталган аймактарда балдардын төрөлүшүнө байланышкан олуттуу көйгөйлөр же чектөөлөр бар экендиги белгилүү.
Бул жагынан жалгыз АКШда гана көрүнүш башка болот – өлкөнүн аймагында христиандардын саны 2050-жылга карата 78% пайыздан 66%га төмөндөп, атеисттер менен агностиктер 16 пйыздан 26%га көтөрүлөт. Ал эми конфессиялардын (иудаизм менен буддизмдин) үлүшү өзгөрүүсүз калат же бир аз өсөт (ислам).
