Бишкек, 7-апр. — Sputnik. Жогорку Кеңештин Отун-энергетика комплекси жана жер казынасын пайдалануу боюнча комитетинин 7-апрелдеги отурумунда "Кумтөр" долбооруна байланыштуу токтомдорунун аткарылышы тууралуу КР өкмөтүнүн маалыматы угулду.
Оторбаев "Centerra Gold Inc." компаниясы менен "Кумтөр" долбоору боюнча сүйлөшүүлөр улантылып, бирок тараптар бир пикирге келе албай жатышканын айтты. Ал 50х50 пайыздык катыштагы биргелешкен ишкананы түзүү кыргыз тарапка пайдасыз экенин белгилеп, «Кумтөр» алтын кенин улутташтыруу боюнча демилгеге да каршы пикирин билдирди.
"Кумтөр" долбоору боюнча биргелешкен ишкана түзүү тууралуу келишим түзүлбөй калганы жакшы болду. Акыркы иликтөөлөр биргелешкен ишкана түзүү биз үчүн экономикалык жактан таптакыр пайдасыз экенин көрсөттү. Ошондой эле алтын кенин улутташтырууга да болбойт. Эгерде ал улутташтырылып калса, жоопкерчиликтин баары бизге түшөт. Адистер азыр кендин абалы анчалык жакшы эмес экенин айтышууда", — деди премьер-министр.
Ал эми тармактык комитеттин төрагасы Кожобек Рыспаев өкмөттүн "Centerra Gold Inc." компаниясы менен жүргүзүлгөн сүйлөшүүлөрүнүн жыйынтыгы анчалык ишеним жаратпай жатканын айтты.
"Биз "Кумтөр" долбоорунун тагдыры боюнча так жооп ала алган жокпуз. Бизди ишендире албагандыктан, Өкмөт мүчөлөрүнүн кенди улутташтырууга каршы пикирин да кабыл албайбыз. Жок дегенде, өкмөт башы ынанымдуу жүйөлөрдү келтириши керек эле, андай болбой калды", — деп кошумчалады депутат.
Талкуунун жыйынтыгында КР өкмөтүнүн "Кумтөр" долбоору боюнча жүргүзгөн иши "канааттандырарлык эмес" деп табылып, Жогорку Кеӊештин "Кумтөр" долбооруна байланыштуу токтомдорунун аткарылышы тууралуу КР өкмөтүнүн маалыматын парламенттин кароосуна алып чыгуу чечими кабыл алынды. Анда КР Өкмөтү "Кумтөр" долбоору боюнча биргелешкен ишкана түзүүнү же аны улутташтырууну сунуш кылбастан, альтернативдүү демилге көтөрүшү күтүлөт.
Эске салсак, быйыл 26-февралда парламентте "Кумтөр" долбооруна байланыштуу токтомдорунун аткарылышы тууралуу КР Өкмөтүнүн маалыматы угулуп, анда КР өкмөтүнө "Centerra Gold Inc." компаниясы менен жүргүзүлүп жаткан сүйлөшүүлөрдү аягына чыгарып, "Кумтөр" кенин иштете турган биргелешкен ишкана түзүү же аны улутташтыруу боюнча сунуш менен келүүгө кошумча убакыт берилген.
