БИШКЕК, 6-апр. — Sputnik. Такталган маалыматтар боюнча Йеменден чыгып Москвага конгон учакта Кыргызстандын беш жараны болгонун КР Тышкы иштер министрлигинин расмий өкүлү Турдакун Сыдыков Кыргызстандын Москвадагы элчилигине шилтеме берүү менен билдирди.
Йеменде кырдаал өлкөдөгү саясий абалга байланыштуу курчуп кеткен. Өлкөнүн түштүгүндө "Аравия жарым аралындагы Аль-Каида" (АЖААК) тобу өз иш-аракеттерин жайылтып, ал эми мамлекеттин борборунда президент тараптагы аскерлер менен хуситтерди колдоочу күчтөрдүн ортосунда атышуулар токтобой жатат.
"Москвага келип конгон акыркы рейсте төрт кишиден турган бир үй-бүлө жана бир аял учуп келди. Учурда алар Кыргызстандын Москвадагы элчилигинде. Билет сатып алгандан кийин алар Кыргызстанга келет", — деди ТИМдин расмий өкүлү.
3-апрелде түрдүү мамлекеттердин жарандары менен Йеменден эки учак учуп келгени кабарланган. Эки учактын ичинде тең үчтөн кыргызстандык болгон. Жекшемби күнү келип конгон учак Йемендеги качкындардын өлкөдөн чыгып кетишине жардам берген россиялык төртүнчү учак болуп калды.
