БИШКЕК, 3 апр — Sputnik. Йеменден эвакуацияланган Россиянын, Кыргызстандын, Өзбекстандын, Польшанын, Украинанын, Йемендин жана Тажикстандын жарандарын алып келген эки учак жумага караган түнү Москвага конду деп билдирет РИА Новости.
Йеменде кырдаал өлкөдөгү саясий абалга байланыштуу курчуп кетти. Өлкөнүн түштүгүндө "Аравия жарым аралындагы Аль-Каида" (АЖААК) тобу өз иш-аракеттерин жайылтып, ал эми мамлекеттин борборунда президентт тараптагы аскерлер менен хуситтерди колдоочу күчтөрдүн ортосунда атышуулар токтобой жатат.
Sputnik кабарчысына Кыргызстандын ТИМинин маалымат ккатчысы Турдакун Сыдыков билдиргендей, Йеменден келген учактын биринчиси менен учуп келген үч кыргызстандыктын аты-жөнү белгилүү.
"Алар 1992, 2001 жана 2003-жылдары туулган балдар. Алардын атасы, улуту араб, Йеменде калыптыр. Энеси болсо, Кыргызстандын жараны, Бишкектен Домодедово аэропортуна келип, балдарын күтүп жатат", — деди Сыдыков.
РИА Новости агенттигинин маалыматы боюнча, эвакуацияланган ар түрдүү өлкөлөрдүн жарандары Йеменде бомба таштоолор бир жумадан ашык жүрүп жатканын айтышты. Алардын көпчүлүгү жер төлөдө жашырынышкан. Мындай абалага чыдап, көтөрүү баарынан балдарга кыйын болгон.
"Акыры биз ал жактан чыгып кеттик. Күн сайын ташталып жаткан бомбалар тынчтык берген жок. Абдан чарчадык. Владимир Путинге рахмат, анын аркасы менен биз бул жерге келдик", — дейт Санада дарыгер болуп иштеген Дина Халимбекова.
Ичинде 310 жүргүнчү бар эки учак Москванын алдындагы "Чкаловский" аскер аэродромуна жумага караган түнү келип конду.
Эвакуациялангандар Йеменден өлкөдөгү оор абалга байланыштуу кетүүгө аргасыз болушкан. Алардына арасында Россиянын, Кыргызстандын, Өзбекстандын, Польшанын, Украинанын, Йемендин жана Тажикстандын жарандары бар.
