БИШКЕК, 2-апр. — Sputnik. УКМКнын Коррупцияга каршы күрөшүү кызматы Баткен облусунун жергиликтүү өзүн-өзү башкаруу органдары бюджеттик каражатты максатсыз пайдаланганын аныкташканын мекеменин маалымат кызматы билдирди.
Текшерүү маалында, Суубашы айыл округунун башчысы айылдык кеңештин төрагасы менен сүйлөшүп алып, мектепке керектеле турчу 780 миң сомду жеке ишкердин эсебине которулганы аныкталган.
"Бул каражатка Мергенов атындагы мектептин коругу менен чатыры оңдолушу керек болчу. Курулушту каржылоо боюнча маселе жергиликтүү айылдык кеңештин депутаттары менен макулдашылган эмес. Андыктан бюджеттен каралган акча максатсыз колдонулган", — деп айтылат билдирүүдө.
Аталган факты боюнча Баткен облусунун прокуратурасы тарабынан "Бюджеттик каражатты мыйзамсыз колдонуу" жана "Кызмат абалынан пайдалануу" беренелери боюнча кылмыш иши козголгон.
