БИШКЕК, 1-апр. — Sputnik. Балыкчы шаарында 30-март күнү секундасына 28 метрге жеткен шамал катталып, 5 мектептин, мамлекеттик бир нече мекемелердин жана турак-жайлардын шыйпырын учуруп, терезелери талкаланды. Бул тууралуу Өзгөчө кырдаалдар министрлигинин маалымат кызматы билдирди.
Маалыматтарга ылайык, шаардагы №1, №4, №6, №10 жана № 22 лицейдин чатырларын учуруп кеткен. Андан сырткары жеке турак-жайлардын да чатыры жабыркаган.
Андан сырткары "Биосфера" дирекциясынын 593 метр чарчы чатырын, Аскер комиссариатынын 60 метр чарчы чатырын жана "Дан" мамлекеттик мекеменин 42 чарчы метр айнегин шамал учуруп кеткен.
Балыкчы шаары боюнча шамал турак-жайлардын, социалдык жана экономикалык объектилердин шыйпырын учуруп, 345 миң 820 сомдук чыгым келтирген.
