БИШКЕК, 30-мар. — Sputnik. Ош шаардык сотунун чечими менен 2015-жылдын 28-мартында АКШ жараны Умар Фарук административдик кылыктары үчүн аталган Кодекстин 390-беренесинин 2-бөлүгү боюнча күнөөлүү деп табылып, өлкөдөн чыгарылды. Бул туурасында УКМКнын маалымат кызматы кабарлады.
УКМК 2015-жылдын 25-мартында Ош шаарынын ички иштер башкармалыгынын кызматкерлери документтерди текшерүү учурунда АКШ жараны Умар Фарук кармагандыгын билдирген.
Тергөө иштеринин жүрүшүндө Умар Фарук андан табылган тергөө документтеринин көчүрмөлөрүн "Бир дүйнө Кыргызстан" укук коргоо уюмунун кеңсесинин юристи, КР жараны Валерьян Вахитовдон алгандыгын айткан. Андан сырткары Умар Фаруктун жанынан аталган укук коргоо уюмунун борборунун менеджери Салиевдин визиттик карточкасы табылган.
УКМКнын маалымат кызматы Умар Фарукту АКШнын Кыргызстандагы элчилигине аны Кыргызстандын аймагынан чыгарып жиберүү үчүн тапшырылгандыгын кабарлады.
