БИШКЕК, 26-мар — Sputnik. Доллардын расмий курсу жылдын башынан бери 4,08 пайызга көтөрүлгөнүн Кыргызстандын Улуттук банкынын төрагасынын орун басары Нурбек Жеңиш бейшемби күнү өткөн маалымат жыйында билдирди.
Анын айтымында, 2015-жылдын 1-мартына карата АКШ долларынын расмий курсу 61,2914 сомду түзгөн жана ал дагы өсөт. Азыр курстун жогорулашына сырткы жана ички факторлор таасир кылды. Сырткы факторлор деп АКШда валюталык жеңилдетүү программасы убактылуу токтотулгандыгын, ошондой эле евронун америка долларына карата төмөндөшүн атоого болот.
"Ички факторлор убактылуу мүнөзгө ээ, себеби биздин өлкө импорттон көз каранды. Атап айтканда, жазгы талаачылык иштери жүрүп жатканда чет элдик валюта бир аз кымбаттайт. Ошондой эле бул өлкөгө четтен алынып келүүчү күйүүчү жана майлоочу майлардын баасынын көтөрүлүшүнө да байланыштуу болот", — деди Жеңиш.
Ал Улуттук банк кырдаалды өз көзөмөлүндө кармап тургандыгын жана зарылчылыгына жараша девальвацияны жеңилдетүү үчүн валюталык рынокко интервенциялар менен чыга тургандыгын баса белгиледи.
"Жылдын башынан бери биз рынокко 155 миллион доллар чыгардык. Доллардын кымбатташына эч негиз жок деп эсептейм. Банктарда 310 миллиондон ашык доллар бар, алардын 77и накчаталай акча", — дейт Улуттук банктын төрагасынын орун басары.
Ал калкка тынчсызданбоону сунуштады. Кечээ доллар алмаштыруучу эң ири түйүн болуп эсептелген Моссоветте доллардын баасы 65 сомго жетти. Бирок бул ашыкча жасалма көрүнүш деп эсептейт финансист.
Өлкөнүн Улуттук банкы менен коммерциялык банктарынын жетекчилери ички валюталык рыноктогу абалды жана андан чыгуу жолдорун мурдатан талкуулашкан.
