БИШКЕК, 26-мар. — Sputnik. Кыргызстандагы бир нече театрлардын кызматкерлери депутат Каныбек Осмоналиев менен жолугушууда эмгек акынын аздыгын, алардын маянасын көтөрүп, кайра түшүрүп салышканына нааразылыгын айтышты. Бул туурасында депутат Бакен Кыдыкеева атындагы Кыргыз мамлекеттик жаштар театры, Муса Жангазиев атындагы Кыргыз мамлекеттик куурчак театры жана Тунгуч театрынын абалы менен таанышууга барганда айтылды.
Осмоналиев алгач Кыргыз мамлекеттик жаштар театрында болуп, ал жердеги абалга кабатырлангандыгын билдирди. Театр кызматкерлери имараттын, анын ичиндеги жабдыктардын эскиргендигин, өткөн мезгил аралыгында бир да жолу оңдоп-түзөө иштери жасалбагандыгын маалымдашты. Осмоналиев бул маселени Жогорку Кеңеште көтөрүп чыгарын айтты.
Учурда артисттер 3500 сом тегерегинде маяна алышарын, театр кызматкерлеринин 95 пайызынын үйү жоктугунан улам, жеңилдетилген ипотекага квартира алууга депутаттын жардам берүүсүн суранышты. Осмоналиев өзү жетектеген тармактык комитетте бул маселени Маданият министрлиги менен бирге кароо тапшырмасын берди.
