БИШКЕК, 26-мар. — Sputnik. Президент Алмазбек Атамбаев Париж шаарындагы өлкөнүн Ишкерлер союзунда уюштурулган кыргыз-француз бизнес-форумуна катышып, анда франциялыктарды Кыргызстанга инвестиция салууга чакырды. Бул туурасында президенттин маалымат кызматы билдирет.
Мамлекет башчысы 800 миңден ашуун ишкананы бириктирген Франциянын Ишкерлер союзунун жетекчилери жана өкүлдөрү менен, ошондой эле анын төрагасы Жан Бюрел менен жолукту. Президент Кыргызстанда Францияга, анын тарыхына, адабиятына жана маданиятына өзгөчө мамиле жасаларын белгиледи.
Президент мамлекеттик органдар тарабынан Кыргызстандын экономика тармагындагы процесстердин ачык-айкындуулугун жогорулатуу боюнча жүргүзүп жаткан саясатын, коррупцияга каршы күрөштү, ошондой эле ири инфраструктуралык долбоорлорду ишке ашыруудагы негизги артыкчылыктарды белгилеп кетти.
"Биз, Кыргызстан эркин элдин, эркин ишкерлердин мамлекети болуш үчүн бардык күч-аракетти жумшайбыз. Инвестор, ишкер Кыргызстанда өз өлкөсүндө жүргөндөй сезиши керек", — деди Атамбаев.
Мамлекет башчысы Кыргызстан Евразиялык экономикалык бирикмеге мүчө мамлекеттердин жана Кытайдын рыногуна чыгууга "ачкыч" боло алат, ушуга байланыштуу мамлекеттин келечекте Евразия мейкиндигиндеги интеграциялык процесстерге катышуусу өзгөчө мааниге ээ экендигин белгиледи.
