БИШКЕК, 16-мар. — Sputnik. Нарын облусунун Ат-Башы районунда малды эмдөө иштери улантылууда. Дарттын алдын алуу үчүн 4000 доза вакцина алынып келгендигин дүйшөмбүдө Өзгөчө кырдаалдар министрлигинин маалымат кызматы билдирди.
Нарын облусунун Ат-Башы районунда кутурма дарты аныкталып, 11-мартта район аймагына карантин киргизилген.
Ат-Башы районундагы Кара-Суу айыл аймагында Жибек-Жолу айылынын тургунунун букасы 2015-жылдын 5-мартында кутурма оорусуна шектүү деп өлтүрүлгөн. Ошондой эле, Ат-Башынын Ак-Сай өрөөнүндөгү Сары-Иймек кыштоосунда 1 кой жана 1 эчкини түлкү тиштеп кутурма дартына шектелген.
11-мартта Ат-Башы районунун мамлекеттик администрациясы Сары-Иймек кыштоосуна жана Жибек-Жолу айылына кутурма оорусу жайылып кетпес үчүн чектөө киргизген.
Ак-Сай өрөөнүнүн Сары-Иймек кыштоосунда 360 чарчы метр жер дезинфекцияланып, 6 адамга алгачкы вакцинация иштери жүргүзүлдү. Аталган кыштоодогу малды эмдөө үчүн 1000 доза вакцина алынып келинген. Учурда 133 баш майда жандык, 36 баш топоз, 10 баш жылкы эмделди.
Кара-Суу айыл аймагына караштуу Жибек-Жолу айылында 50 чарчы метр жер дезинфекцияланып, 5 адам кутурмага каршы эмделди. Айыл жериндеги малды эмдөө үчүн 3000 доза вакцина алынып келинген.
Эгер эмдөө иштери жүргүзүлгөндөн кийин 16 күндүн ичинде жаңы учурлар катталбаса, карантин алынат.
