БИШКЕК, 16-мар. — Sputnik. Президент Алмазбек Атамбаев Россиянын президенти Владимир Путинге көптөгөн курмандыктарды алып келген Казань шаарындагы соода борборунда болгон өрт кырсыгына байланыштуу көңүл айтты. Бул туурасында президенттин маалымат кызматы билдирди.
"Кыргызстандын элинин жана жеке өзүмдүн атыман каза тапкандардын туугандарына жана жакындарына терең кайгыруу менен көңүл айткан сөздөрүмдү, ошондой эле жапа чеккендердин бардыгына тезирээк сакайып кетишин каалагандыгымды билдирип коюңузду өтүнөм", — деп айтылат КР президентинин телеграммасында.
Татарстандын борбор калаасындагы соода борборундагы өрт шаршемби күнү күндүз болгон. Анын кесепетинен 17 киши каза болуп, 36 киши жабыр тартса, 14 киши ооруканага жаткырылган. Каза болгондордун арасында Россиянын жарандыгын алган кыргызстандык бир жаран да болгон.
