БИШКЕК, 14-мар — Sputnik. Кыргызстандын Мамлекеттик каттоо кызматы КР жарандыгын алууну каалаган жарандарды автоматташтырылган жаңы маалыматтык система аркылуу тейлеп баштайт. Бул максатта "Миграция" аттуу атайын системанын концепциясы иштелип чыкканын аталган ведомствонун маалымат кызматы билдирди.
Кыргызстандын жарандыгын алам деген чет элдик жарандардын документтерин карап чыгуу көп убакытты жана адам күчүн алат. Андыктан бирдиктүү автоматташтырылган системаны түзүү ишти бир топ эле жеңилдетет.
"Өзгөчө кагаз түрүндө алынган документтерди карап чыгуу, жарандардын ким экендиги тууралуу маалыматтарды сактоо жана аларды тийиштүү мамлекеттик органдарга тапшыруу машакаттуу иш. Негизги маселе каттоо документтеринин көптүгү жана аны иштеп чыгууда көп күчтүн талап кылынышы башкы көйгөй", — деп айтылат каттоо кызматы тараткан билдирүүдө.
Эгерде "Миграция" концепция ишке ашып калса, маалыматтарды карап чыгуу тездеп, зарыл болгон учурда кошумча маалыматтарды маалында киргизүүгө шарт түзүлөт. Бул система көп деңгээлдеги коргоого алынып, маалыматтардын коопсуздугу биринчи орунга коюлат.
Келечекте аталган система аркылуу мөөнөтү өтүп кеткен паспортторду аныктоо бир кыйла жеңилдеп, калкка сапаттуу кызмат көрсөтүү дагы жакшырат, деп ишендирет Мамкаттоо кызматы.
2012-жылдан тарта Кыргызстандын жарандыгы алууну каалаган чет элдик жарандардын саны арта баштаган. 2012-жылы Кыргызстандын жарандыгын 555 чет элдик жаран алса, 2013-жылы бул көрсөткүч 664 кишиге жеткен. Ал эми 2014-жылдын алты айында 327 кишиге Кыргызстандын жарандыгы берилген.
Ошол эле учурда 2012-жылы Кыргызстандын жарандыгын алуу үчүн жазылган 6380 арыз калса, 2013-жылы 6993 арыз, 2014-жылдын биринчи жарымында 6016 арыз каралган.
