БИШКЕК, 13-мар. — Sputnik. Куран окуу боюнча 12 мартта Бишкекте өткөн жарышта Куранды толук жаттагандардын арасынан Умаров Мухаммадали, Курандын 1/3 бөлүгүн жаттагандар арасынан Анарбай уулу Абдулхади, Куранды кырааты менен окугандар арасынан Кушубаков Бекболсун биринчи орундарды алышты.
Ар бир номинация боюнча үчтөн жеңүүчү аныкталып, акчалай сыйлыктар ыйгарылды.
Бул жарышты төрт жылдан бери уюштуруп келген “Адеп Башаты” коомдук-прогрессивдүү фондунун мүдүрү Жумадил Маматжанов жарыш жаштар арасындагы жакшы жактарга жетелөөгө багытталгандыгын айтты.
"Фондубуз ар жылы уюштуруп келе жаткан бул жарыш, элибизге Куранды таанытуу, жайылтуу, сүйдүрүү жана жаштарды Куранды окуп, үйрөнүүгө кызыктырууга үндөйт" — деди Маматжанов.
Ага Кыргызстандын жети облусунан келген 15 жаштан 25 жашка чейинки отуз бала катышты.
