БИШКЕК, 10-мар — Sputnik. Борбор шаарга таштанды тазалаган 30 автоунаа келет деп билдирди Бишкек шаарынын башчысы Кубанычбек Кулматов шейшембиде өткөн маалымат жыйында.
Анын айтымында, шаар тазалаш үчүн "Тазалыктын" 225 техникасынын ичинен күнүгө 60-70ке чукулу чыгат.
"Тазалык" иштебей жатат деп айтканга болбойт, бирок, материалдык-техникалык базасы начар. Таштанды тазалаган автоунаалардын ар биринин иштөө графиги бар, бирок, элдин саны өсүп жатат. Андыктан, Европалык реконструкция жана өнүгүү банкынын долбоору менен европалык стандарттагы 5 миң контейнер жана таштанды тазалаган 30 даана техника алып келүү пландалууда", — деп айтты шаар башчысы.
Кулматов чогултулган таштандынын 65 пайызын кайра иштетүүгө боло тургандыгын айтты.
2014-жылдын январь айында борбордук мэрия Европалык реконструкция жана өнүгүү банкы менен "Бишкек шаарындагы таштандыларды жөнгө салуу системасын жакшыртуу" долбоору боюнча макулдашууга кол койгон.
Макулдашууга ылайык, мэриянын маалымат кызматы Европалык реконструкция жана өнүгүү банкынын долбоорунун башкы максаты жаңы конуштардын жана борборго жакын жайгашкан айылдардын санитардык-эпидемиологиялык абалын жакшыртуу.
