БИШКЕК, 6-мар. — Sputnik. Борбор калаада "Хизб ут-Тахрир" экстремисттик уюмуна элди үгүттөп жүргөн анын активдүү мүчөсү кармалды деп кабарлады УКМКнын маалымат кызматы.
Ал адам эл арасында диний экстремисттик уюмга тартуу иштерин жүргүзүп жана Кыргызстандын конституциялык түзүмүн кулатуу чакырыктары басылган экстремисттик адабияттарды жайылтуу боюнча активдүү иштеп келген.
"Тинтүү учурунда тыюу салынган адабияттар табылды. Бул фактылар боюнча Улуттук коопсуздук боюнча мамлекеттик кызматы (УКМК) кылмыш ишин козгоо үчүн процессуалдык чаралар көрүлүп жатат ", — деп билдирди маалымат кызматы.
УКМК Ички иштер министрлиги менен биргеликте өлкө аймагында диний экстремизмге каршы иш-чараларды жүргүзүп жатат.
Шейшемби күнү аталган кызматтын маалымат кызматы Бишкекте "Хизб ут-Тахрир" экстремисттик уюмунун аялдар ячейкасы табылып, иши токтотулгандыгын кабарлаган.
