БИШКЕК, 5-мар. — Sputnik. "Себат" билим берүү мекемеси 2-март күнү Yeni Akit интернет басылмасында жарыяланган кабар чындыкка коошпой турганын расмий түрдө билдирди.
Yeni Akit басылмаса кыргызстандык журналист Абдүлмежит Чаркыноглуна таянуу менен билим берүү мекемесинин Токмок шаарындагы кыздар лицейинин окуучулары эшектин этинен ууланды деп жазган. Бул такталбаган маалыматтар Кыргызстандын да бир катар электрондук басылмаларына жарыяланган.
Аталган билим берүү мекемеси такталбаган маалыматтардын ЖМКларда жарыяланышы окуучулардын, ата-энелердин жана мугалимдердин нааразычылыгын жаратканын белгиледи.
20-февраль күнү Токмок шаарындагы башталгыч класстын окуучулары ууланган. Санитардык-эпидемиологиялык көзөмөлдөө борбору анын себеби быштак менен сүттөн экенин аныктаган.
Билим берүү жаатында Кыргызстанда 23 жылдан бери иш алып барган мекеме, ар бир азык-түлүктү тиешелүү сертификаттардын негизинде гана сатып аларын баса белгиледи.
