Бишкек, 3-мар. — Sputnik. Республикадагы Мамлекеттик салык кызматы 2014-жылдын жыйынтыгы боюнча Бирдиктүү салык декларациясын кабыл алуу боюнча кампаниянын экинчи этабын баштады. Бул туурасында салык кызматынын маалымат кызматынан кабарлашты.
Декларациялар 2015-жылдын 23-31-март аралыгында саат 09.00дөн 24.00гө чейин кабыл алат.
2015-жылдын 31-мартына чейин жеке жактар 2014-жылы алынган кирешелер же жер тилкелери жана мүлк объектилери, экономикалык ишмердиктери тууралуу жана башка маалыматтар жөнүндө салык органдарына отчет берүүлөрү керек.
Тактап айтканда, аталган мөөнөткө чейин мамлекеттик кызматкерлер, жеке ишкерлер (анын ичинде патенттик негизде салык төлөгөндөр), менчигинде салык салынуучу кыймылдуу (транспорт) жана кыймылсыз (батир жана үй) мүлкү жана жер тилкеси (короо-жай участкаларынан башка) бар жеке жактар, юридикалык жакты түзбөй туруп ишмердиктерин ишке ашырышкан дыйкан жана фермердик чарбалар Бирдиктүү салык декларацияны берүүгө милдеттүү.
"Декларацияны өз убагында тапшырбаган жеке жактарга 2000 сом өлчөмүндө административдик айып салынат", — деп билдирди маалымат кызматынан.
2-мартта юридикалык жактар үчүн декларациялык кампаниянын биринчи этабы аяктады. Мамлекеттик салык кызматы маалыматтар иштелип чыккандан кийин Бирдиктүү салык декларацияны тапшыруунун жыйынтыгын чыгарат жана бул тууралуу коомчулукка толук маалымат берет.
Кеңири маалыматты салык кызматынын Маалымат борборунун 194 номери аркылуу алууга болот.
