БИШКЕК, 1-март — Sputnik. Жогорку Кеңештин депутаты Дастан Бекешев, Билим берүү жана илим министри Эльвира Сариева жана KICB банкынын жетекчиси Кванг Янг Чой катышканын парламенттин маалымат кызматы билдирди.
Иш-чара Бишкек шаарындагы көрүүсү начар балдардын жатак мектебинде өттү. Депутат Бекешев мектеп окуучуларына кайрылып, алардын өз алдынча Кыргызстандын тарыхы менен таанышуу мүмкүнчүлүгү ачылганын белгиледи.
"Окуу китептери Брайл быдырлуу чекит тамгасы менен терилген. Эми аны өзүӊөр окуй аласыӊар. Мен ушул мектепте окуп жүргөндө, мындай мүмкүнчүлүк жок болгондуктан, Кыргызстандын тарыхын мугалимдер окуп берчү. Бул китеп жакшы билим алууӊарга түрткү берет", — деди эл өкүлү.
"Кыргызстандын тарыхы" окуу китептерин басып чыгаруу демилгеси Жогорку Кеӊештин депутаты Дастан Бекешев тарабынан көтөрүлүп, аталган банк тарабынан колдоого ээ болгон.
Депутат Д.Бекешев кыргыз тили менен кыргыз адабияты боюнча окуу китептерин да ушундай эле ыкмада басып чыгаруу иштери пландалып жатканын билдирди.
Белгилей кетсек, көзү начар балдарга арналган атайын окуу китептери Брайл быдырлуу чекит тамгасы менен 485 томдук жана ири жалпак тамга менен терилген 175 томдук басылып чыкты. Мындай окуу китептери Бишкек жана Ош шаарларынын көрүүсү начар балдар китепканалары үчүн толук жетиштүү. Окуу китептери Билим берүү жана илим министрлиги тарабынан сунушталган.
