БИШКЕК, 27-фев. — Sputnik. Чүй облусунун Кемин райондук сотунун 25-февралдагы өкүмү менен Нарын облусунун Ички иштер башкармалыгынын тез чара көрүүчү атайын отрядынын кызматкери, милициянын прапорщиги Б.Ч. жана ошол эле башкармалыктын уюшкан кылмыштуулукка каршы күрөшүү бөлүмүнүн опери, милициянын ага лейтенанты С.Ж. Кылмыш жаза кодексинин 305-беренеси "(Кызматтык ыйгарым укуктардан аша чабуу") жана 104-беренеси ("Саламаттыкка атайылап оор залал келтирүү") боюнча күнөөлүү деп табалып, 15 жылга эркинен ажыратылды. Бул тууралуу Жогорку соттун маалымат кызматы билдирди.
Соттолгон кызматкерлери 2013-жылдын 1-декабрында, саат 11-00 чамасында Жумгал районундагы Кара-Кече көмүр кенине келишкен. Ал жактан Чаек айылынын тургуну А.М. аттуу жарандын айдап жүргөн автоунаасын мыйзамсыз токтотуп, терезелерине чапталган күңүрт пленкаларды белгисиз нерселер менен чийишип, коркутуп, уруп-сабашкан. кесепетинен А.М. аттуу жаран каза болуп калган.
Аталган жарандардын жаза өтөө мөөнөтү камакка алынган күндөн баштап эсептелинет. Өкүмгө нааразы тарап 10 күндүн ичинде Чүй облустук сотуна Кемин райондук соту аркылуу арызданууга же сунуш берүүгө акылуу.
Алар жазасын түзөтүү абагында күчөтүлгөн тартипте өтөйт.
