Бишкек, 26-фев.— Sputnik. Жогорку Кеңештин спикери Асылбек Жээнбеков чет мамлекеттер тарабынан каржыланган жалпыга маалымдоо каражаттарынын ишмердүүлүгүн тиешелүү тараптар карашы керек деген пикирин парламентте айтты.
"ЖК идеалдуу иштеп жатат дегенден алысмын… Айрым кемчиликтер үчүн айрыкча, чет мамлекет тарабынан каржыланган каналдар, жалпыга маалымдоо каражаттары бийликтин бир бутагынын жумушун жокко чыгарып жатат. Каалайбы каалабайбы, бир аз болсо да сыйлаш керек. Ага бааны эл берет, ал кийинки шайлоодо берилет. Мамлекеттик коопсуздук, маалыматтык коопсуздук боюнча маселени тиешелүү тараптар карашы керек", — деди Жээнбеков.
Ал Кыргызстан эл аралык интеграциялык уюмдарга кирүүгө багыт алгандан тарта кайсы бир тараптардан чабуул күчөгөндүгүн айтты.
"Кыргызстандын эл аралык интеграциялык уюмдарга, Бажы биримдигине кире тургандыгы чечилгенден бери маалыматтык чабуул күчөдү. Бул боюнча эки комитет чогулуп, (Коргоо жана коопсуздук боюнча комитети, Билим, илим, маданият жана спорт боюнча комитети – ред) караңыздар, муну тартипке койбосок болбойт", — деди төрага.
Бүгүнкү пленардык жыйында депутаттар Айнуру Алтыбаева менен Турсунбай Бакир уулу да журналистттердин ишине сын-пикирин билдирип, маалыматтарды так бербей, бурмалап жатышат деген дооматын айтышкан.
