БИШКЕК, 25-фев — Sputnik. Бишкекте футбол боюнча турнир шаардык кеңештердин командалары арасында өтөт деп билдирди Бишкек шаардык кеңештин маалымат кызматы.
Турнир шаршемби күнү башталып, 28-февралга чейин уланып, ага республиканын 25 шаарынан шаардык кеңештердин 25 командасы катышат.
Уюштуруучулар аталган иш-чараны жогорку деңгээлде өткөрүүгө ниеттенип жатышат.
"Бишкек шаардык кеңеши спортту ар дайым колдоп, сергек жашоого үндөп келет. Спорт эрки бекемдеп, жеңишке гана багыттабастан, айланасына бир максаттагы адамдарды топтойт. Шаардык кеңештердин максаты бирөө гана ал – элдин жашоо деңгээлин жакшыртуу. Муну менен шаардык кеңештин депутаттары футбол талаасында эле кездешпестен, ай тегерек отуруп өздөрүнүн шаарларынын түйүндүү маселелерин да талкуулоого ниеттенип жатышат", — деп айтышты маалымат кызматынан.
Иш-чаранын программасынын алкагында шаардык кеңештин депутаттарынын футзал боюнча Кубоктун катышуучусу – спикер Асылбек Жээнбеков жана Жогорку Кеңештеги фракциянын лидерлери менен жолугуусу пландалып жатат.
